സ്പെഷൽ മട്ടൺ ബിരിയാണി
എന്തൊക്കെ ആണ്? ഒരു സ്പെഷ്യൽ മട്ടൻ ബിരിയാണി അങ്ങ് ഉണ്ടാക്കിയാലോ? കിടിലൻ ആയിരിക്കും അല്ലെ? ഹോട്ടലിൽ പോയി കഴിക്കാൻ പറ്റാത്ത സാഹചര്യം ആയതു കൊണ്ട് നമുക്ക് സ്പെഷ്യൽ മട്ടൻ ബിരിയാണി വീട്ടിൽ ഉണ്ടാക്കി നോക്കാം. നാവിൽ കൊതിയൂറുന്ന ഈ കിടിലൻ ബിരിയാണി എങ്ങിനെ ആണ് ഉണ്ടാക്കുക എന്ന് നോക്കാം.
സ്പെഷ്യൽ മട്ടൻ ബിരിയാണി ഉണ്ടാക്കാൻ ആവശ്യമായ സാധനങ്ങൾ
1. കൈമ അരി - ഒരു കിലോ
2. എണ്ണ - 150 ഗ്രാം
3. ഏലയ്ക്ക - മൂന്ന്
കറുവാപ്പട്ട - ഒരു കഷണം
ഗ്രാമ്പൂ - മൂന്ന്
4. സവാള - ഒന്ന്, അരിഞ്ഞത്
കാരറ്റ് പൊടിയായി അരിഞ്ഞത് - ഒരു വലിയ സ്പൺ
5. വെള്ളം -- അരി അളന്ന പാത്രത്തിൽ ഒന്നേമുക്കാൽ പാത്രം
ഉപ്പ് - പാകത്തിന്
6. തക്കാളി - ഒരു ചെറുത്, അരിഞ്ഞത്
പച്ചമുളക് - ഒന്ന്, നെടുകെ പിളർന്നത്
ഇഞ്ചി-വെളുത്തുള്ളി പേസ്റ്റ് - ഒരു വലിയ സ്പൂൺ
കറിവേപ്പില - ഒരു തണ്ട്
മല്ലിയില അരിഞ്ഞത് - ഒരു വലിയ സ്പൂൺ
നെയ്യ് - ഒരു വലിയ സ്പൺ
നാരങ്ങാനീര് - ഒരു ചെറിയ സ്പൂൺ
7. മട്ടൺ - ഒരു കിലോ
8. ഇഞ്ചി- വെളുത്തുള്ളി പേസ്റ്റ് - ഒരു വലിയ സ്പൂൺ
കുരുമുളകുപൊടി - ഒരു ചെറിയ സ്പൂൺ
തക്കാളി - ഒന്ന്, അരിഞ്ഞത്
ഉപ്പ് - പാകത്തിന്
മഞ്ഞൾപ്പൊടി - അര ചെറിയ സ്പൂൺ
വെള്ളം - ഒരു കപ്പ്
9. എണ്ണ - 50 ഗ്രാം
10. സവാള - ഒന്ന്, കനം കുറച്ചരിഞ്ഞത്
കശുവണ്ടിപ്പരിപ്പ് - 50 ഗ്രാം
11. സവാള - മൂന്ന്, കനം കുറച്ചരിഞ്ഞത്
12. തക്കാളി - നാല്, അരച്ചത്
13. ബിരിയാണി മസാല - ഒന്നര ചെറിയ സ്പൂൺ
പച്ചമുളക് - ആറ്, ചതച്ചത്
ഉപ്പ് - പാകത്തിന്
14. മല്ലിയില അരിഞ്ഞത് - നാലു വലിയ സ്പൂൺ
15. മല്ലിയില അരിഞ്ഞത് - രണ്ടു വലിയ സ്പൂൺ
നെയ്യ് - ഒരു വലിയ സ്പ്പൂൺ
കാരറ്റ് അരിഞ്ഞത് - ഒരു വലിയ സ്പൂൺ
ബിരിയാണി മസാല - അര ചെറിയ സ്പൂൺ
നാരങ്ങാനീര് - ഒരു വലിയ സ്പൂൺ
കുങ്കുമപ്പൂവ് - ഒരു ചെറിയ സ്പൂൺ, അൽപം പാലിൽ കുതിർത്തത്
ഇനി എങ്ങിനെയാണ് സ്പെഷൽ മട്ടൺ ബിരിയാണിപാകം ചെയ്യുക എന്ന് നോക്കാം
# അരി അളന്ന ശേഷം കഴുകി വാരി വയ്ക്കുക.
# എണ്ണ ചൂടാക്കി മൂന്നാമത്തെ ചേരുവ ചേർത്തു മൂപ്പിച്ച് ശേഷം സവാളയും കാരറ്റും ചേർത്തിളക്കുക. നിറം മാറും മുൻപ് വെള്ളവും ഉപ്പും ചേർത്തു തിളപ്പിക്കണം.
# തിളച്ച ശേഷം ആറാമത്തെ ചേരുവയും അരിയും ചേർത്തിളക്കി കുക്കർ അടയ്ക്കുക. ആവി വരുമ്പോൾ വെയ്റ്റ് വച്ച് അഞ്ചു മിനിറ്റ് വേവിക്കുക. (ആദ്യത്തെ രണ്ടു മിനിറ്റ് നല്ല തീയിലും പിന്നീടുള്ള മൂന്നു മിനിറ്റ് ചെറുതീയിലും)
# മട്ടൺ കഴുകി വൃത്തിയാക്കി എട്ടാമത്ത ചേരുവ ചേർത്തു വേവിക്കുക.
# ബിരിയാണിച്ചെമ്പിൽ എണ്ണ ചൂടാക്കി പത്താമത്തെ ചേരുവ ഗോൾഡൻ ബ്രൗൺ നിറത്തിൽ വറുത്തു കോരി മാറ്റിവയ്ക്കണം.
# ഇതേ എണ്ണയിലേക്കു മൂന്നു സവാള കനം കുറച്ചരിഞ്ഞതു ചേർത്ത് ഇളം ബ്രൗൺ നിറത്തിൽ വഴറ്റി മാറ്റി വയ്ക്കുക.
# ഇതേ എണ്ണയിലേക്കു തക്കാളി അരച്ചതു ചേർത്തു വഴറ്റിയ ശേഷം പതിമൂന്നാമത്തെ ചേരുവയും വേവിച്ച മട്ടൺ ഗ്രേവിയോടു കൂടിയും ചേർക്കുക.
# ഇതിലേക്കു വഴറ്റി മാറ്റി വച്ചിരിക്കുന്ന സവാളയും നാലു വലിയ സ്പൂൺ മല്ലിയില അരിഞ്ഞതും ചേർത്തു വഴറ്റി തീ അണയ്ക്കുക.
# ഈമസാലയുടെ മുകളിൽ ഒരു വാഴയില വച്ച്, അതിനു മുകളിൽ വേവിച്ചു വച്ചിരിക്കുന്ന ചോറു നിരത്തുക. ഇതിനു മുകളിൽ പതിനഞ്ചാമത്തെ ചേരുവ നിരത്തണം.
# ഇനി പാത്രം ഫോയിൽ പേപ്പർ കൊണ്ടു മൂടി, അഞ്ചു മിനിറ്റ് നല്ല തീയിലും 10 മിനിറ്റ് ചെറുതീയിലും വച്ചു ദം ചെയ്യുക.
# ബിരിയാണി വിളമ്പാൻ നേരം മുകളിൽ നിന്നു ചോറു കോരിയെടുത്ത് ഒരു പാത്രത്തിലാക്കുക. മസാല മറ്റൊരു പാത്രത്തിലുമാക്കുക.
# സവാളയും കശുവണ്ടിപ്പരിപ്പും വറുത്തതും മല്ലിയില അരിഞ്ഞതും കൊണ്ട് അലങ്കരിച്ചു വിളമ്പാം.
